سلسلة المعيشة فى استراليا: الجزء 1 قبل السفر

أول حاجة: المشاوير اللى محتاج تعملها

طبعا زى ما قولت فى المقدمة الحاجات دى بقولها بناءا على خبرة شخصية و خبرة اصدقاء ليا ، يلا نبدأ

فيش و ترجمته

طبعا احنا عارفين ان الفيش الجنائى تاريخ صلاحيته 3 شهور ، لكن خد بالك تاريخ صلاحيته هيفضل مستمر طالما دخلت استراليا و هو تاريخه سارى ، فلو احتاجته لأى سبب هيكون متاح معاك

توكيل رسمى عام و بنوك لحد بتثق فيه

و دا بيتعمل فى اى شهر عقارى و مش لازم الشخص اللى بتوكله يكون معاك لكن لازم يكون معاك رقم بطاقته أو صورة بطاقته افضل ، ناس كتير سافرت و اكتشفوا انهم محتاجين يخلصوا معاملة فى بلدهم لكن للأسف مكانوش عاملين لحد توكيل. ممكن يتعمل فى السفارة فى استراليا تقريبا لكن الحقيقة مش متأكدة ، و حتى لو بيتعمل فى استراليا بالتأكيد هياخد وقت و يعطلك. خد بالك ان التوكيل اسمه رسمى عام و بنوك لكن صلاحيته فى البنوك تنحصر فى السحب و الايداع لكن مالهاش علاقة بفتح حساب مثلا او استخراج كارت جديد ، فبالتالى لو عايز حد يكون ليه الصلاحيات دى يبقى لازم تعمله توكيل بنكى

توكيل بنكى

و دا بيتعمل فى البنك نفسه بتاعك و فى الفرع الأساسى اللى انت فاتح فيه الحساب ، و لازم يكون معاك الشخص اللى بتعمله التوكيل و بتمضوا قدام موظف خدمة العملاء ، الشخص اللى وكلته بيكون ليه كل الصلاحيات ماعدا قفل الحساب

مشاوير الدكاترة ، خصوصا دكتور الأسنان 

موضوع فى منتهى الأهمية لأن فى استراليا مشاكل الأسنان بتكلف كتير، ال Medicare اللى هو التأمين الصحى مش مغطى الأسنان و العيون ، فبيكون لازم تأمين خاص و بياخد وقت علشان يتفعل. فأحسن حاجة أى مشاكل فى الأسنان تتحل قبل السفر ، و لو محتاجين نظارات طبية كمان تظبطوها قبل السفر. و هنبقى نتكلم عن موضوع ال Medicare دا بالتفصيل فى فيديو منفصل ان شاء الله

تجديد رخصة القيادة 

لو قربت تنتهى و الأفضل يكون الإسم مطابق للباسبور ، و بتترجم ترجمة NAATI (فى زملاء بيقولوا ان ممكن الإسم فى الرخصة يكون مختلف عن الباسبور لكن يتكتب صح فى الترجمة و مش بيكون فى مشكلة ، لكن انا شايفة ان الأفضل يكون الإسم مطابق) ، و مترجمة الناتى المعروفة فى مصر اسمها سلمى عشماوى 

خد بالك ان لو جددت الرخصة تاريخ بداتها هيكون بتاريخ تجديدها فهتحتاج تستخرج حاجة من المرور بردو اسمها

شهادة بيانات

و دى بيكون فيها بيانات انت بتسوق من امتى و بتوثقها من مديرية الأمن و من الخارجية بعد استخراجها من المرور و طبعا بتحتاج تترجمها ناتى هى كمان .. خد بالك لما توصل بالسلامة بإذن الله ليك ترجمة ناتى لتقريبا 10 ورقات تبع ادارة الهجرة تقدر تعرف تفاصيلها من الموقع الرسمى من هنا فممكن تستنى لما تيجى و تترجمهم

هتسألنى و دى ايه فايدتها اصلا؟! دى هتنفع الناس اللى بقالها سنين بتسوق و فى منتهى الأهمية اثناء استخراج رخصة القيادة الاسترالى ، لأنك لو بتسوق فى بلدك 3 سنين أو أكتر تقدر تاخد الرخصة الاسترالى Full license (بعد اختبار القيادة فى استراليا طبعا) و بالمناسبة انت بتقدر تسوق برخصة بلدك عادى جدا لما تيجى استراليا لفترة معينة و هنتكلم عن موضوع رخصة القيادة بالتفصيل فى فيديو منفصل ان شاء الله

اوراق اولادك

لو عندك اسرة و اولاد هتحتاج تستخرج أوراق مدارس الأولاد و التطعيمات

و طبعا اهم حاجة بشكل عام انك تجمع كل اوراقك و اوراق اسرتك (لو متزوج و عندك اسرة) ، بمعنى اى اوراق شايف انها مهمة او مش مهمة ، ممكن تتفاجئ انك محتاجها لما تسافر

الانترنت و الموبايل

فى كمان مشوار ممكن تحتاج تعمله و هو ايقاف الانترنت الأرضى لو البيت هيتقفل أو تغيير الباقة أو اى شيئ محتاج تغيره بخصوص الانترنت

و حاجة كمان مهمة و هى انك تتأكد ان خط الموبايل بتاعك ينفع يكون تجوال علشان لو مرتبط بحسابك البنكى و محتاج تحتفظ بيه. طبعا تكلم خدمة العملاء و هم هيساعدوك تعرف و لو مش تجوال هيقولولك تروح الفرع و تغير الشريحة و انت قاعد مافيش اى مشكلة

دا بالنسبة للمشاوير اللى ممكن تحتاجوا تعملوها ، تعالوا نتكلم على تانى حاجة و هى الحاجات اللى هتحتاجوا تشتروها

الحاجات اللى ممكن تحتاجوا تشتروها

طبعا مش هتكلم عن شراء الهدوم و النواقص بشكل عام ، هتكلم على الحاجات اللى ممكن ماتكونوش واخدين بالكم منها

طبعا اول حاجة هى الشطافات المتنقلة Fresh Buzz ، طبعا مش محتاجة اتكلم على اهميتها ، اشترى 2 احتياطى
فى حاجة بتردو هتحتاج تشتريها علشان لما تشترى شطافة ثابتة فى استراليا ، و دى هى المفك بتاع السباكة .. ممكن طبعا تشتريه من استراليا لكن هيكون احسن لو جبته معاك و هينفعك جدا فى تركيب الشطافة الثابتة

بالمناسبة دى الشطافة الثابتة اللى اشتريتها بعد ما وصلت استراليا من
ebay
و كان تركيبها بسيط و ممتازة بالظبط زى الشطافات العادية و هتلاقوا اللينك بتاعها تحت الفيديو

تانى حاجة اشترى مشترك دولى لأن مداخل الكهرباء فى استراليا مختلفة ، متوفر فى السعودية و الخليج اكتر من مصر ، لكن فى مصر لقيته على امازون و فى فتح الله ، و طبعا ماتنساش تشترى مشتركات عادية كمان

و بردو اشترى محول الفيش الاسترالى لعادية زى دا من
ebay
بردو و اشترى مشترك كل مداخله استرالى لأن هتحتاجه

تالت حاجة شراء الملابس القطنية بشكل عام زى مثلا الملابس الداخلية و الشرابات و البديهات القطن للسيدات ، عايزة اقول ملاحظة مهمة جدا للصيادلة فى الجزء دا بالذات البنات المحجبات تشترى بديهات بكم بيضا و سودا لأن بالطو الصيادلة فى استراليا نصف كم ، و للبنات و الشباب الصيادلة اشتروا بناطيل سوداء و حذاء اسود لأن دا لبس الصيادلة هنا

طبعا بالنسبة للمحجبات بردو اشتروا لبس محجبات و طرح و بندانات و دبابيس طرح و الحاجات دى

اشتروا كمان كنكات لو بتحبوا تعملوا قهوة 

و اخيرا شراء الأدوية بالذات المضادات الحيوية (مش هقول اسماء معينة للأدوية) ، و طبعا اى ادوية لأمراض مزمنة ، و اكيد مسكنات و ادوية للمغص و الاسهال و الامساك و الحموضة و القيئ و الكحة و الحساسية و كريمات للجروح و الحروق و الكدمات و الفطريات و التسلخات و معجون الأسنان و فرش الأسنان و ليفة الاستحمام و مستحضرات العناية الشخصية بشكل عام

طبعا فى ادوية كتير هنا ممكن تشتريها من غير روشتة لكن بردو الأفضل تجيب الأدوية المهم ليك معاك

تأجير البيوت

فى حاجة اخيرة عايزة اتكلم عليها فى الفيديو دا و هى تأجير البيوت فى استراليا
طبعا حاول تسأل الناس اللى ساكنين فى المدينة اللى هتنزل عليها فى استراليا عن السكن ممكن حد يقدر يساعدك .. فى جروب على الفيس بوك اسمه
Land down under
دا جروب اغلبه ناس عايشين فى استراليا من سنين .. ادخل عليه و اسألهم
و كمان ممكن تدخل على مواقع زى
Realestate, domain
و تشوف اسعا الايجارات فى اى مكان فى استراليا و ممكن تقدم على تأجير بيت .. لكن خد بالك هو للأسف التأجير فى استراليا مش سهل اوى لأن بانسبالهم الناس اللى عايشين فى استراليا و ليهم
History
بيكون ليهم اولوية


لو جى على شغل ممكن المكان اللى هيشغلك يساعدك تلاقى بيت تأجره


طبعا اول ما بتنزل استراليا بتبقى حاجز سكن مؤقت من
Airbnb
مثلا .. او لو ماعندكش مشكلة انك تشير مع حد فى بيت ممكن تدور على
flatmates
هتدخل على الويب سايتس دى و تقارن الاسعار و تختار المناسب ليك و تقدم عليه