سلسلة المعيشة فى استراليا: الجزء 5 – أول اسبوع فى استراليا

حاجات تعملها اول ايام

1 شراء خط موبايل

اول حاجة تشترى sim card سواء من المطار او لما تدخل البلد و دا موجود فى اماكن كتير من ضمنهم Coles و Woolworth و دول زى كارفور و فتح الله فى مصر ، ممكن تلاقى فيهم sim card عليها عروض زى مثلا كارت اسمه Optus انا جيبته كان عليه شهر مجانا و باقة انترنت 30 جيجا فى الشهر و فى باقات اكتر من كدا كمان ، و بعد الشهر المجانا بيكون الاشتراك 30 دولار فى الشهر تقريبا حسب الباقة اللى هتختارها ، المهم بتشترى الخط اللى انت عايزه و بتفعله عن طريق برنامج بتنزله على الموبايل وبعدين بتتابع عليه استهلاكك

بالمناسبة فى انواع خطوط كتير و مش فارق تجيب نوع ايه لأنك ممكن تحول بعد كدا من شركة لشركة تانية مع الاحتفاظ برقمك ، اهم حاجة يكون العرض اللى عليه مناسب بالنسبالك ، و بالمناسبة كمان المكالمات كلها مجانا جوا استراليا من اى خط لأى خط و فى باقات اضافية ممكن تشترك فيها علشان تكلم بلدك بتديلك دقائق حسب الباقة ، و دى طبعا ميزة كويسة جدا. طبعا لو اسرة الخطوة دى للزوج و الزوجة

2 فتح حساب بنكى

تانى حاجة تعملها هى حساب فى البنك  ، بردو مش فارقة تفتح حساب فى بنك ايه ، شوف البنك اللى موجود فى المنطقة اللى انت فيها و افتح فيه ، يعنى انا مثلا المدينة اللى انا فيها فيها commonwealth bank ففتحت فيه ، و فتح الحساب سهل و بيتم و انت قاعد ، طبعا يكون معاك الباسبور و الجرانت و طبعا هتبقى محتاج تكتب عنوانك او عنوان صديق علشان الكارت يوصل عليه أو عنوان صندوق بريد بتأجره سواء مجانا او بمقابل مادى على Australian post لحد ما تأجر سكن دائم

معلومة كمان عايزة اقولها ، فى ناس فتحت حساب فى البنك دا اونلاين قبل ما توصل ، و لما وصلوا عملوا زيارة للفرع و فعلوا الحساب و استلموا الكارت ، انا الحقيقة ماعملتش كدا ، لكن تقدروا تدخلوا على موقع البنك الرسمى و تقرأوا اكتر عن الموضوع دا

و ابقى استخرج bank statement  لأنك هتحتاجه فى اثبات العنوان فى خطوات تانية ، ممكن يسألوك على ال Tax file number قولهم انك هتعمله لسة او عملته و ماوصلكش (طبعا فى حالة لو قدمت عليه)

3 فتح ملف ضريبى Tax File Number

و دا يودينا لتالت حاجة المفروض تعملها و هى ال TFN و دا هو الرقم الضريبى ممكن يتعمل اونلاين مجانا على الموقع بتاع الضرايب اللى اسمه ATO هتدخل تملى بياناتك و بيوصلك جواب فيه الرقم الضريبى على عنوانك خلال 10 ايام تقريبا ، بعد ما الرقم يوصلك بتضيفه على بيانات حسابك فى البنك و دا بيتم عن طريق برنامج الموبايل الخاص بالبنك ، و بالمناسبة تقدر تحول مابين حساباتك وتقدر تحول لأى حساب عن طريق البرنامج ، و الكارت الخاص بحسابك بيوصلك خلال اسبوعين و حسب البنك اللى انت فاتح فيه الحساب. لو اسرة الخطوتين دول للزوج و الزوجة

4 التقديم على المديكير

رابع حاجة تعملها هى انك تقدم على ال Medicare حسب نوع الفيزا بتاعتك و دا هو التأمين الصحى و التقديم بيكون عليه اونلاين و مجانا بردو على الموقع الرسمى ، بتملى فورم و تبعت الاوراق المطلوبة على الايميل و بيوصلك كارت المديكير خلال شهر او اكتر مالهاش وقت محدد و هنتكلم على ال Medicare و كمان على التأمين الصحى الخاص بالتفصيل بردو فى فيديو منفصل ان شاء الله ، و طبعا ماتنساش تنزل برنامج المديكير على موبايلك

5 البحث عن سكن

بالتوازى مع كل اللى فات دا المفروض انك تدور على سكن ، لو انت لوحدك و ممكن تتشارك سكن مع شخص تانى ممكن تدور على موقع flatmate.com.au ، و لو عايز سكن ليك لوحدك ممكن تدور على realestate.com.au او domain.com.au 

بتقدم application لكل الأماكن اللى شايفها مناسبة ليك ، لكن خد بالك انك تأجر بيت فى استراليا دا بيعتمد على حاجات كتير مش زى البلاد العربية ، بيفضلوا اللى ليه history و مأجر قبل كدا و بيكون ليه الأولوية ، و كذلك لو شخص بيشتغل و لو عنده سيارة بيكون ليه اولوية و هكذا. فقدم على اكتر عدد من البيوت المتاحة و لو ليك صديق ممكن يساعدك فى انك تلاقى بيت اسرع او لو جى على شغلك ممكن شغلك يساعد تلاقى بيت

طبعا بعد ما بتلاقى سكن دائم هتشوف اذا كان مفروش او مش مفروش و تشترى الحاجات اللى ناقصاك فى البيت بالذات الاجهزة الكهربائية زى التلاجة و الغسالة و كمان المرتبة و البطانية و ادوات المطبخ و حاجة تانية مهمة جدا بالنسبالنا ، الشطافة الثابتة ، و دا النوع اللى انا جبته من على
ebay

6 Photo ID

سادس حاجة محتاج تعملها هى حاجة اسمها Photo ID علشان ماتحتاجش تمشى بال passport  بعد كدا و دى بتطلع من اى فرع مرور -مثلا المرور فى ولاية فيكتوريا اسمه Vicroads - لكن خد بالك لو ناوى تقدم على رخصة القيادة الاسترالية مباشرة يبقى مش هتكون محتاج تقدم على ال photo ID لأن الرخصة الاسترالية بتستخدم لإثبات الشخصية. لو اسرة الخطوة دى للزوج و الزوجة

بصراحة انا شخصيا ماعملتش Photo ID و فضلت ماشية بالباسبور ، و اعرف ناس كتير ماعملوهوش عادى

حاجات تتعمل بعد فترة

1 ربط المديكير و الملف الضريبى ب mygov

الخطوة دى بعد ما يوصلك الرقم الضريبى و كارت المديكير ، هتفتح حساب على موقع mygov و دا موقع تقدر تربط عليه كل الخدمات الحكومية الخاصة بيك فى استراليا ، و بعدها تعمل ربط لحسابك على ATO ، لو ماعرفتش تربطه بالمعلومات المتاحة (شوف الفيديو) هتحتاج تتصل برقم خدمة العملاء و تطلب منهم Linking code للربط ب mygov ، وقتها تقدر تربطه بالكود اللى هيبعتوهولك

نفس الكلام بالنسبة لربط حساب المديكير ، ممكن تحتاج تكلم خدمة العملاء علشان يبعتولك كود للربط 

2 رخصة القيادة

طبعا زى ما قولنا قبل كدا تقدر تسوق برخصة القيادة بتاعة بلدك لفترة معينة حسب نوع الفيزا بتاعتك و حسب الولاية اللى انت فيها - مثلا لو فى فيكتوريا ، لو معاك فيزا اقامة دائمة او مؤقتة ليك 6 شهور ، و لو فى كوينزلاند مثلا ليك 3 شهور لو اقامة دائمة و لو معاك اقامة مؤقتة تقدر تسوق بيها لحد ما تحصل على اقامة دائمة ، فلازم تراجع قوانين الولاية اللى انت رايحها

الخطوة اللى بعد كدا هى الاستعداد و عمل امتحانات رخصة القيادة الاسترالية و دى بتختلف من ولاية لولاية -راجع الموقع الرسمى لمرور الولاية اللى انت فيها ، و شراء سيارة طبعا خطوة اساسية فى ناس بتشترى اول ما بتوصل و فى ناس بنتنظر حسب المبلغ المالى اللى مع كل شخص بعد الوصول ، و طبعا لما بتشترى السيارة لازم تعمل تأمين عليها ، بالنسبالى انا اشتركت فى AAMI لكن فى شركات تأمين تانية 

3 الاشتراك فى التأمين الصحى الخاص

الخطوة دى ممكن تعملها فى الأول و ممكن تتأخر فيها شوية ، لكن الأفضل تعملها من الأول لأن المديكير مش بيغطى حاجات من ضمنها مثلا الاسنان و العيون و الاسعاف 

تقدروا تعرفوا اكتر عن الحاجات اللى بيغطيها او مش بيغطيها المديكير من هنا

بالنسبالى انا اشتركت فى BUPA لكن فى شركات تانية كتير لو تحبوا تقارنوا الأسعار ، هتدخلوا على الموقع و تختاروا بياناتكم و الباكدج اللى تناسبكم ، او لو محتارين ممكن تكلموهم على الشات هيسألوكم شوية اسئلة و هيبعتولكم باكدج مناسبة

حاجة فى منتهى الأهمية بالنسبة للاشتراك فى التأمين الصحى الخاص ، لو عمرك 31 او اكتر هتدفع نسبة زيادة اسمها Lifetime Health Cover و للأسف النسبة دى بتزيد بشكل سنوى ، لكن لو دخلت استراليا بعد 31 سنة ممكن يتم اعفائك من المبلغ دا ، طبعا تواصل مع شركة التأمين الصحى الخاص و هيطلبوا منك جواب تجيبه من ميديكير اسمه  Medicare Lifetime Health cover Applicable Date letter

دا بتكلم ميديكير و تطلبه منهم و بيوصلك على البيت خلال اسبوعين تقريبا و بتبعته على الايميل لشركة التأمين الصحى الخاص و يقدروا وقتها يعفوك من دفع ال LHC

حاجات تانية

فى كام حاجة كمان هقولهم دلوقتى لكن للأسف ماعنديش عنهم معلومات كتير لأنهم خاصين بالأسر اللى معاهم اطفال ، و بما انى single فأنا ماعملتش الكلام دا اكيد لكن حابة اشاركه معاكم

اثبات سجل التطعيمات immunization record الخاص بالأطفال ، و دا بيتم عن طريق زيارة طبيب GP او اى عيادة من عيادات التطعيمات 

و بردو بالنسبة لو شخص بياخد علاج لمرض مزمن محتاج يروح ل GP علشان يكتبله العلاج دا و يقدر يصرفه من الصيدليات فى استراليا ، او يطلب تحاليل و يشوف لو هيحتاج يغيره

حاجة كمان شوفت ناس كاتبة عنها لكن دى لأصحاب فيزا الإقامة الدائمة فقط و هى التقديم على ال Family Tax Benefits من خلال Centrelink و دا طبعا للأسر اللى عندها اطفال. و الخطوة دى بتتعمل للزوج و الزوجة

و كمان الأسر اللى عندها اطفال من سنة ل 4 سنوات و محتاجين Child care Centre ، هتحتاج تدور و تكتب اسماء اولادها فى قائمة الانتظار للمراكز دى ، فيه دعم لمصاريف المراكز دى child care subsidy و ممكن التقديم عليه مع ال Family Tax Benefits

لو صيدلى

فى حاجة زيادة لو انت صيدلى لازم تعمل ال AHPRA proof of identity

دا تعديل حصل من بداية 2024 اتكلمت عليه فى مقالة تانية .. بعد وصولك بالسلامة بإذن الله هتملى فورم اسمه

POIA-00

 و بترفعه للأبرا زى ما مكتوب على الموقع الرسمى - اقرأ هنا

و طبعا تدور على فرصة شغل انترن