تنبيه: نحن لا نقدم نصائح قانونية. الموقع و مرفقاته هى خلاصة خبرة شخصية لصيادلة خاضوا تجربة الهجرة بدون اللجوء الى محامى او مكاتب هجرة. جميع المواقع الرسمية لكل الخطوات ستكون متاحة ليمكنك مراجعتها فى أى وقت. لكن وجب التنبيه ، اذا وجدت أنك لا تستطيع أن تقوم بهذه الخطوات بنفسك ، برجاء الإستعانة بمحامى أو مكتب هجرة
فى المقالة اللى فاتت اتكلمنا على 16 حاجة لازم تعرفها قبل ما توصل لإستراليا ، النهاردة فى المقالة التالتة من سلسلة المعيشة فى استراليا هتكلم على اماكن فى استراليا و مواقع و برامج موبايل محتاج تعرفها قبل ما تسافر هيفيدوك جدا لما توصل بإذن الله
اماكن مهمة فى استراليا
أول حاجة عايزة اقولكم أسامى اشهر الأماكن اللى تشتروا منها و ليها برامج على الموبايل و هقولكم كمان ازاى تكسبوا نقاط تعملكم خصومات مع كل مرة بتشتروا من الأماكن دى
فى مكانين مشهورين جدا هم Coles و Woolworth ، دول زى كارفور و فتح الله كدا فى مصر هتلاقى فيهم كل حاجة محتاجها ، كل انواع الأكل و الشرب و الفواكه و الخضروات
فى مكان اسمه Big W و Target و Aldi و دول فيهم تنوع فى المنتجات ، فيهم ادوات و اجهزة للبيت و ملابس و Aldi كمان فيه أكل و حاجات تانية كتير .. أنا اشتريت من Big W جزء من ادوات المطبخ
و فى مكان اسمه Kmart بردو مشهور جدا بأدوات البيت و الأجهزة الكهربائية ، اشتريت منه اللحاف و البطانية و المخدات و ادوات للمطبخ
فى مكان اسمه Bunnings Warehouse و دا مشهور بأدوات البيت من الإبرة للصاروخ زى ما بيقولوا
و فى مكان اسمه Officeworks و دا للأدوات المكتبية
الجميل فى الأماكن دى زى ما قولتلكم ان ليها برامج على الموبايل فتقدروا تشوفوا المنتجات اونلاين و تقارنوا الأسعار و انتم قاعدين فى مكانكم ، و الأغلب كمان فيه delivery فأكيد دى حاجة مفيدة جدا
نظام نقاط الشراء
و الأجمل ان فى برنامجين للمكافآت بيدولك نقاط كل ما تشترى (نقطة لكل دولار هتدفعه)
فيه نظام مكافآت اسمه Everyday Rewards و دا متعاقد مع Woolworth, Big W
و كمان متعاقدين مع شركة اسمها Origin و دى ممكن تتعاقد على الكهرباء و الغاز معاها (حسب بيتك فيه ايه منهم) و ممكن تتعاقد على الانترنت كمان و تكسب نقاط
و فى نظام تانى اسمه Flybuys و دا متعاقد مع Coles, Kmart, Target, Bunnings, Officeworks
و برنامجين المكافآت متعاقدين كمان مع شركات طيران و شركات بنزين و أماكن تانية - دى المواقع الرسمية
طيب ازاى اصلا بتكسب النقاط دى و بتصرفها ازاى؟ الأول بتنزل برامج المكافآت دى على الموبايل و تشترك فيها ، و بعد ما تشترك هيكون ليك باركود ، أو ممكن تاخد كارت Flybuys من Coles و انت بتحاسب اطلبه من الكاشير ، كل ما تروح مكان من اللى اتكلمنا عليهم دول تشترى حاجة تعدى الباركود بتاع برنامج المكافآت كمان مع الحاجات اللى بتشتريها ، كل ما تجمع 2000 نقطة دا هيساوى 10 دولار
طبعا أكيد فى اماكن اكتر من اللى اتكلمت عليهم دول ، لكن دول من اشهر الأماكن و اللى اتعاملت مع اغلبهم بشكل مباشر فحبيت انقلكم خبرتى
و اكيد لو تعاقدت مع اى شركة للكهربا او الغاز او الانترنت او خط الموبايل نزل البرانامج بتاعها ، و كذلك البنك اللى فتحت فيه حساب هتنزل البرنامج بتاعه ، كل التعاملات دى بتتم ببرامج الموبايل
برامج اخرى مهمة
عايزة اكلمكم عن برامج تانية بردو مهمة جدا و أولهم برنامج اسمه Petrol Spy Australia ، خد بالك فى استراليا البنزين بتاع العربيات سعره مش ثابت و بيتغير من بنزينه للتانية علشان كدا هتحتاج البرنامج دا علشان تشوف اسعار البنزين و تختار الأحسن فى السعر
فى برنامج كمان هتحتاجه لو هيوصلك دليفرى عن طريق Australian Post اسمه AustPost بتقدر تتبع عليه الحاجة اللى هتوصلك
فى شركة طيران اسمها Fly Bonza بتعمل رحلات رخيصة بس مش لكل ال destination ، نزل البرنامج بتاعها لما توصل ان شاء الله اكيد هيفيدك
فى كام برنامج بردو مهمين جدا للمسلمين
تقدروا تعرفوا من خلال الموقع او البرنامج بتاعه اقرب مسجد
و طبعا اى برنامج لتحديد القبلة و مواعيد الصلاة ، زى برنامج صلاتك
و اى موقع او برنامج لل
EST Halal checker
بتفتحوا الموقع او البرنامج و تكتبوا رقم ال EST اللى مكتوب على اللحمة و بيطلعلكم اذا كانت حلال ولا لأ
و زى ماقولنا بردو فى المقالة اللى فاتت لو عايز تشترى حاجة Second Hand او حاجات اسعارها قليلة ، شوف على
Facebook marketplace,
ملخص المقالة
كدا اتكلمنا على الأماكن و البرامج المهم تعرفها قبل ما توصل استراليا ياريت تكتبولى فى التعليقات لو المقالة مفيدة بالنسبالكم ، فى الفيديو اللى جاى هكلمكم عن حجز الطيران لاستراليا و الرحلة كلها و تجربتى الشخصية ، ماتنسوش تعملوا لايك و سبسكرايب للقناة علشان تكملوا باقى السلسلة ، و اشوفكم على خير
د. آلاء نصر