سلسلة المعيشة فى استراليا: الجزء 4 – رحلة الطيران

الفيديو دا هيفيد اكتر المبتدئين و اللى ماسافروش قبل كدا زيى كدا ، انا دى كانت اول مرة اسافر فيها فى حياتى ، لكن حتى لو مش مبتدئ فى السفر شوف الفيديو للآخر لانى هقولكم على تجربتى السيئة مع شركة الطيران اللى سافرت معاها و اخطاء حاولوا تتفادوها فى السفر .. الفيديو هيكون منقسم لجزئين ، حجز الطيران و الرحلة نفسها. يلا نبدأ بأول جزء

حجز الطيران

فى معلومة لازم تكون عارفها و هى انك ممكن تحجز مع شركة الطيران مباشرة او عن طريق وسيط زى Skyscanner ، و هكلمكم فى المقالة دى عن الاتنين

الحجز على Skyscanner

الأول نبدأ ب Skyscanner ، بتدخل على الموقع و بتختار المطار اللى هتخرج منه (مطار برج العرب فى اسكندرية مثلا) و تكتب المطار اللى هتنزل فيه (هنختار ملبورن كمثال) ، و تختار ان الرحلة رايح بس ولا رايح و راجع (طبعا اغلبنا رايح بس) ، و تختار عدد الأفراد ، و تختار المعاد اللى عايز تسافر فيه

خد بالك لو حد هيستقبلك فى استراليا حاول تختار معاد سفرك مناسب لأيام اجازة الشخص دا ، طبعا انت سفرك هيكون مثلا يوم الجمعة هتوصل يوم السبت او الأحد (خد بالك من النقطة دى لأن الرحلة وقتها طويل). و بالمناسبة فى جروب على ال facebook اسمه land down under فيه عرب كتير عايشين فى استراليا و ممكن تقولهم على معاد وصولك و حد يستقبلك ، هم فى منتهى الشهامة و عاملين الخدمة دى للناس اللى لسة رايحة استراليا

المهم لما تختار كل البيانات دى و تضغط next هيظهرلك كل شركات الطيران اللى عاملة رحلات فى اليوم دا (زى القطرية و الاماراتية و السنغافورية و غيرهم) و بيظهرلك طبعا سعر الرحلة و تفاصيلها و كام ترانزيت و عدد ساعات الانتظار فى كل ترانزيت ، و تقدر تختار اى شركة منهم و تحجز عن طريق موقع skyscanner

بس الحقيقة انا انصح انك تحجز من موقع شركة الطيران مباشرة حتى و لو اغلى شوية لكن بيكون فيها مرونة اكتر فى تغيير معاد الرحلة مثلا ، و لو لا قدر الله حصل مشكلة اثناء الرحلة تقدر ترجع لشركة الطيران مباشرة

الحجز على شركة الطيران

نفس الخطوات تقدر تعملها على موقع الطيران الرسمى ، زى الطيران القطرى ، للأسف حصلتلى معاهم تجربة سيئة جدا و هقولهالكم كمان شوية ، المهم بتختار نفس الاختيارات اللى كنت مختارها قبل كدا و بتشوف الرحلات المتاحة فى اليوم دا و تختار الدرجة اللى انت عايزها ، انا اخترت economy ، و هتلاحظ هنا انك ليك مرة تعمل تغيير فى الرحلة سواء معاد الرحلة او ال destination ، و هتشوف عدد الشنط المسموح بيها و الوزن ، الصفحة اللى وراها بتملى بياناتك و بعد كدا بتختار لو عايز كرسى معين فى الطيارة ، لكن طبعا الاختيار بمصاريف اضافية حسب نوع و مكان الكرسى اللى بتختاره ، و لو مش هتختار عادى فى ال check-in هتختار من الكراسى اللى مش محجوزة

تجربتى مع القطرية

و انا تجربتى الشخصية انى غيرت ال destination ، و بالمناسبة ممكن تختار مدينة غير العواصم ، و فى الحالة دى بتتضاف رحلة داخلية على خط طيران مختلف عن القطرية لكن بيكون شامل الشنط اللى معاك ماعدا لو اشتريت شنطة زيادة

فمتغلطوش غلطتى انا كنت شارية شنطة زيادة 23 كيلو قبل ما اغير ال destination ، للأسف بعد التغيير لقيتها مش متضافة على الرحلة الأخيرة اللى على خطوط طيران مختلفة على الرغم من ان موظف خدمة العملاء كنت سألته قبل ما اغير ال destination و كان مأكد عليا ان الشنطة هتتضاف للرحلة الأخيرة ، و لقيت انى هتفاجئ و انا فى مطار ملبورن بالفلوس اللى المفروض ادفعها للشركة التانية علشان الشنطة تطلع على الطيارة الثالثة ، فللأسف ماخدتهاش معايا و خسرت الفلوس اللى كنت دفعتها اللى هى كانت 6090 جنيه وقتها و خسرت الحاجات اللى كنت مخططة انى اخدها معايا ، غير انى لما نزلت مطار ملبورن لقيت عجلة مكسورة من شنطة من اللى معايا ، خدمة العملاء للأسف انا من تجربتى معاهم سيئة جدا و مافادونيش بأى شيئ ، بل بالعكس ادولى معلومات غلط للأسف خسرتنى كتير و لما طالبت بتعويض عن الخسائر لقيت ردهم مش مفيد نهائى

انا بردو مش عايزة اعمم التجربة ، فى ناس بتسافر على القطرية و ماحصلهمش مشاكل ، لو عايزين تسافروا عليها تجنبوا تشتروا شنطة زيادة لو هيكون فى رحلة داخلية على شركة طيران تانية

و كمان خدوا بالكم المفروض لو لقيت عجلة مكسورة فى شنطة ، و انت فى المطار لازم تعمل report للموضوع دا ، للأسف الترانزيت بتاعى كان وقته قليل جدا مالحقتش اعمل report

طبعا مش محتاجة اكرر الخطوات على موقع الطيران الاماراتى او السنغفورى او اى طيران متاح عليه رحلة فى اليوم اللى انت عايزه و اللى شوفتهم كلهم على skyscanner ، هى نفس الخطوات باختلاف الخدمات اللى بتقدمها شركة الطيران

معلومة كمان مهمة انت ممكن تدفع اونلاين او فى مكتب شركة الطيران ، حبيت ااكد عليكم الموضوع دا لأن فى limits على الدفع بالكروت فى مصر حاليا فلو اسرة مسافرة مثلا و المبلغ كبير ممكن ماتعرفش تدفعه اونلاين

نصيحتى لو هتختار الكرسى فى الطيارة ، اختار كرسى قريب من الحمام  ، و لو بتحب الشباك تختار جنب الشباك طبعا و بلاش على الجناح مباشرة علشان لو حابب تصور الرؤية تكون احسن ، و حظك يبقى حلو لو الكرسى اللى جنبك طلع فاضى لأن ممكن تستخدم الاتنين عادى و تنام عليهم و دا اللى حصل معايا ، و طبعا خلى معاك شطافة محمولة Fresh Buzz طول الرحلة

خد بالك انك ممكن تعمل ال check-in اونلاين قبل الرحلة ب 48 ساعة تقريبا او حسب شركة الطيران اللى طالع عليها ، دا للناس اللى ماتعرفش بيكون زى تأكيد على شركة الطيران انك طالع الرحلة

رحلة الطيران

قبل الخروج

فى الجزء التانى من المقالة هكلمكم على الرحلة نفسها باختصار ، طبعا يكون معاك الباسبور و الجرانت و طابع ورقة حجز الطيران و يكون معاك قلم (بأكد عليكم لأنى نسيته و قعدت ادور على قلم مع الناس) ، لو انت خارج من مصر خلى فى جيبك عشرات و عشرينات لأنك هتتفاجئ بناس بتشيلك الشنط و تقولهالك صريحة كدا "صبح عليا" ، انا اسفة جدا انى بقول كدا لكن للأسف دا واقع ، غير ان لازم تعمل حسابك ان فى تفتيش ذاتى سيئ جدا ، و لو تقدر تلبس البنطلون من غير حزام يكون احسن لأنك هتفضل تقلع و تلبس و تلبس الحزام كل شوية ، و طبعا المبلغ اللى مسموح تخرج بيه حاليا هو 10 الاف دولار امريكى او ما يعادله و هتتسأل فى المطار معاك كام و غالبا ممكن يطلبوا منك يشوفوا الفلوس

خد بالك مش مسموح ببرفانات او deodorant او اى سوائل ولا ادوات حادة زى المقص مثلا فى الشنطة اللى هتطلع معاك الطيارة ، فالحاجات دى تحطها فى شنطة من الشنط الكبيرة اللى هتنزل بطن الطيارة

و خد بالك كمان مش مسموح ان يكون فى بطاريات زى الحجارات اللى بتتشحن مثلا انها تكون فى الشنطة اللى فى بطن الطيارة ، فالحاجات اللى زى دى خليها معاك فى الشنطة اللى هتطلع فوق فى الطيارة .. و طبعا التعليمات دى هتلاقيها مع شركة الطيران اللى حجزت معاها فياريت تراجعها كويس من مصدرها

المفروض توصل المطار قبل الرحلة ب 3 ساعات او زى ما مكتوبلك فى التذكرة اللى حجزتها ، هتدخل المطار هيحصل تفتيش للشنط و تفتيش ليك بتقلع الساعة و الحزام و شنطة الوسط و اى حاجة ، هيسألوك على الفلوس اللى معاك و على اى حاجة شاكين فيها فى الشنط ، و ابقى اقفل الشنط بأقفال و خلى مفاتيحها معاك طبعا لزيادة الأمان ، و بعدين فى موظف بياخد بياناتك ، بعدها هتروح على مكتب شركة الطيران اللى انت طالع عليها هيوزنوا الشنط و يحطوا عليها tags مكتوب عليها كل مسار رحلتك و يدولك ال boarding pass اللى هى التذاكر اللى بتطلع بيها الطيارات كلها اللى هتركبها فى رحلتك (و اتأكد ان الشنط مش هتنزل فى الترانزيت على السير و انها هتتحول من الطيارة الاولى للتانية بدون تدخلك) و بيدولك كمان ورقة تملى بياناتك ، بعد ما تملاها بتدخل بيها و بالباسبور لظابط الجوازات وبيسألك على التأشيرة (الجرانت) ، بيشوف الكلام دا و يختملك ختم الخروج

بعدها بتدخل على تفتيش تانى للشنطة الصغيرة اللى معاك و بيتعملك تفتيش ذاتى  ، بعدها خلاص كدا تروح على ال gate اللى طالعة منها الطيارة

فى مطار الترانزيت بتشوف ال gate اللى طيارتك التانية طالعة عليها على شاشة كبيرة بتكون موجودة ، و لو مالقتها اسأل على الكاونتر ، بعدها هتعدى على تفتيش ، بعدها لما بتوصل لل gate بيكون فى تفتيش كمان مرة ، بعدها بتعمل check-in و بتقعد تستنى الطيارة قدام ال gate

خد بالك انا رحلتى كان فيها 2 ترانزيت ، واحد فى الدوحة و التانى فى ملبورن ، و للأسف الاتنين كانوا فى حدود ساعتين ، دا قليل يادوب يكفى انك تخرج من الطيارة و تمشى فى المطار لل gate اللى المفروض تركب منها التانية. حاول لما تختار رحلتك الترانزيت يكون وقته اطول من كدا شوية

قبل الوصول

اهم حاجة هو و انت على الطيارة اللى هتنزل فى استراليا (ايا كان هتنزل فين) بيدولك ورقة صغيرة كدا بتكتب فيها بياناتك و بلدك و رقم رحلتك و بتعمل declaration بأى حاجة معاك ، اهم حاجة فيها هى اول اختيار دا لو معاك اى ادوية تختار Yes و هيسألو فى المطار انت معلم عليه ليه هتقولهم معايا ادوية OTC لنفسى بس

و هتعلم لو معاك 10 الاف دولار استرالى او اكتر ، او ما يعادلهم طبعا من العملات التانية و فى المطار هيخلوك تملى ورقة بردو declaration بالمبلغ اللى معاك بالظبط و بيانات تانية زى رقم تليفون و عنوان لو عايزين يوصلولك ، ممكن تكتب عنوان و رقم صديق فى استراليا بس تقولهم طبعا ، و هيسألوك الفلوس دا بتاعتك ولا جايبها لحد هتقولهم بتاعتك طبعا لو بتاعتك

لو معاك حاجات جلد بردو او اخشاب لازم تعمل declaration و تقولهم معاك ايه

و طبعا لو انت من مصر هتختار افريقيا و هيسألوك كنت فى مكان تانى غير مصر فى افريقيا هتقولهم لأ ، او لو روحت مكان تانى فى افريقيا هتقولهم عليه طبعا

بعد وصولك المطار و ال declaration كدا حمدالله على السلامة انت دخلت استراليا ، لو عندك رحلة داخلية اجرى على ال gate اللى الطيارة هتطلع منها ، و لو ماعندكش خلاص اخرج من المطار بالسلامة و روح ريح فى فندق علشان تستعد للحاجات التانية اللى المفروض تعملها علشان وصلت و اللى هكلمكم عليها ان شاء الله فى المقالة اللى جاية